ՀՀ Մշտական ներկայացուցիչ Անդրանիկ Հովհաննիսյանի ելույթը ՄԱԿ ՄԻԽ 53-րդ նստաշրջանին՝ Բարձր հանձնակատարի զեկույցին ի պատասխան

20 հունիսի, 2023

Պարոն նախագահ,

Հայաստանը շնորհակալություն է հայտնում Բարձր հանձնակատարին մարդու իրավունքների իրավիճակը աշխարհում ներկայացնելու համար:

Արժևորում ենք Բարձր հանձնակատարի ուշադրությունը Լաչինի միջանցքով ազատ ու անվտանգ երթևեկության կարևորության հանդեպ, ինչպես նաև նրա կոչը՝ բացառելու դրա փակման հումանիտար ազդեցությունը քաղաքացիական բնակչության վրա:

Լեռնային Ղարաբաղի բնակչությանը վեց ամիս պաշարման մեջ պահելուց հետո, անցած շաբաթ Ադրբեջանն արգելեց նույնիսկ այն սահմանափակ մարդասիրական առաքումները, որոնք իրականացնում էր Կարմիր Խաչի Միջազգային Կոմիտեն: Ակներև են հումանիտար աղետի և նախապատրաստվող էթնիկ զտման բոլոր նախանշանները:

Հայաստանը սատարում է Բարձր հանձնակատարի տեսլականն առ այն, որ Մարդու իրավունքների ՄԱԿ Բարձր հանձնակատարի գրասենյակը պետք է ներգրավվի հումանիտար իրավիճակներում և առավել լայն մասնակցություն ունենա հակամարտությունների վաղ ազդարարման ու կանխարգելման, գործողությունների ծրագրավորման ու պատրաստվածության ՄԱԿ արձագանքման ծրագրերի ուղղորդման գործում:

Հումիտար դերակատները պետք է վայելեն կարիքն ունեցող բնակչությանը հասնելու լիակատար, անվտանգ և անխոչընդոտ հնարավորություն: Այս համատեքստում սատարում ենք Բարձր հանձնակատարի շարունակական ջանքերը՝ ապահովելու հասանելիությունը հակամարտության գոտիներում գտնվող մարդկանց:

Մենք համամիտ ենք, որ տեղում կանոնավոր մշտադիտարկման և շփումների բացակայությունն այդ մարդկանց ավելի խոցելի է դարձնում՝ նրանց իրավունքների ոտնահարման առումով: Հայաստանը մնում է Լեռնային Ղարաբաղում ՄԱԿ-ի, մասնավորապես՝ Բարձր հանձնակատարի գրասենյակի ներգրավման և ներկայության ջատագովը, մինչդեռ Ադրբեջանը շարունակում է խոչընդոտել նման ներգրավումը:

Մարդու իրավունքների միջազգային մարմինների ամբողջ համակարգն արդեն իսկ լայնորոն ու համապարփակ արձանագրել և արտահայտվել է Լեռնային Ղարաբաղի ժողովրդի իրավունքների ոտնահարման շուրջ: ժամանակն է, որ միջազգային հանրությունը ձեռնարկի հստակ քայլեր: ՄԱԿ-ի Մարդու իրավունքների պաշտպանության մեխանիզմները իրավունք չունեն անպաշտպան թողնել այս մարդկանց:

Շնորհակալություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր